माईजोगमाईमा खोरेत रोगविरुद्धको पाचौ चरणको खोप अभियान सञ्चालन हुँदै

माईजोगमाई गाउँपालिकामा खोरेत रोग नियन्त्रणका लागि खोरेत रोगविरुद्धको खोप कार्यक्रम सञ्चालन हुने भएको छ।
गाउँपालिकाले एक सूचना जारी गर्दै २०८३ साल असोज २ गतेदेखि  गाउँपालिकाका सबै ६ वटै वडामा खोप अभियान सञ्चालन गर्न लागेको जनाएको हो।
गाउँपालिकाका अनुसार निर्धारित कार्यतालिकाअनुसार सम्बन्धित क्षेत्रमा खटिने प्राविधिकमार्फत किसानका गाई, गोरु तथा भैँसीलगायत पशुलाई खोरेत रोगविरुद्धको खोप लगाइनेछ। गाउँपालिकाले आफ्ना पशुलाई अनिवार्य रूपमा खोप लगाउन सम्पूर्ण पशुपालक किसानलाई अनुरोध गरेको छ।

६ वटै वडामा प्राविधिक परिचालन

गाउँपालिकाले जारी गरेको सूचनामा वडा नं. १ देखि ६ सम्मका लागि विभिन्न पशु प्राविधिकहरू खटाइएको उल्लेख छ। किसानले आफ्नो क्षेत्रका लागि खटिएका प्राविधिकसँग समन्वय गरी पशुलाई खोप लगाउनुपर्नेछ।

गाउँपालिकाले खोप अभियान सफल बनाउन वडाका जनप्रतिनिधि, टोल विकास संस्था, सहकारी संस्था, कृषक समूह, डेरी व्यवसायी तथा राजनीतिक दलका प्रतिनिधिहरूलाई समेत आवश्यक सहयोग र सहकार्य गरिदिन आग्रह गरेको छ।
माईजोगमाई क्षेत्रमा पशुपालन तथा दुग्ध उत्पादन महत्वपूर्ण कृषि गतिविधिका रूपमा रहेको छ।

किसानलाई गाउँपालिकाको आग्रह

गाउँपालिकाले खोप अभियानका क्रममा आफ्ना पशुलाई छुट्न नदिई सम्बन्धित प्राविधिकसँग सम्पर्क गरी समयमै खोरेतविरुद्धको खोप लगाउन सबै पशुपालक किसानलाई अनुरोध गरेको छ।

*माईजोगमाई गाउँपालिकाले खोरेत रोगविरुद्धको खोप अभियान सञ्चालनसम्बन्धी जारी गरेको सूचना।*