इलामको माइजोगमाई गाउँपालिकामा मलामी चढेको ट्र्याक्टर दुर्घटना हुँदा तीन जना घाइते भएका छन् ।
आज दिउँसो १ बजेतिर माइजोगमाई–१, लप्सीबोटेमा नयाँबजारबाट जोगमाई खोलातर्फ गइरहेको प्र न १–०१– ००१ ९९५२ को ट्र्याक्टर दुर्घटना भएको हो ।
ट्रली पल्टिएर भएको दुर्घटनामा माइजोगमाई–३, गुप्तीका योगेन्द्र पाठक, रविन काफ्ले र माइजोगमाई ३, लालीखर्कका गिरिराज श्रेष्ठ घाइते भए । घाइतेमध्ये गिरिराज गम्भीर छन् भने अन्य केही सामान्य घाइते भएका छन् ।
श्रेष्ठलाई झापा रेफर गरिएको छ । उनको टाउको र हातमा समस्या देखिएको डाक्टरले बताएका छन् । काफ्लेको गालामा चोट लागेको र पाठकको कुमको हड्डी फुटेको डाक्टरले बताए । अर्कै कामका लागि गइरहेको ट्रयाक्टरमा आधा बाटोबाट मलामी चढेका थिए । दुर्घटनाको कारण खुलेको छैन ।
घाइतेहरूलाई फिक्कलस्थित प्राथमिक स्वास्थ्य केन्द्रमा उपचारका लागि लगिएकोमा दुई जना डिस्चार्ज भएका छन् ।
